Сите туристи, без разлика дали им е потребна виза или не, ќе мора да поминат проверка на социјалните мрежи пред да им биде дозволено да влезат во САД, според новите планови што ги разгледува Царинската и граничната заштита (CBP).
Предложените измени се отворени за јавна расправа 60 дена.
Според известувањето објавено во Федералниот регистар на САД во вторник, странските туристи ќе мора да ги достават своите податоци за социјалните мрежи од последните пет години.
Ќе биде задолжително да се предадат информациите, но и други детали – вклучувајќи е-адреси и телефонски броеви користени во последните пет години, како и имиња, адреси, броеви и датуми на раѓање на членови на семејството и биометриски податоци, пишува Sky News.
Постојат неколку извештаи за патници на кои веќе им е одбиен влез во САД поради објави и пораки на социјалните медиуми пронајдени на нивните лични уреди откако претседателот Доналд Трамп ја презеде функцијата во јануари.
Ова вклучува и француски научник кој беше вратен на границата со САД во март откако на неговиот телефон биле пронајдени пораки „кои одразуваат омраза кон Трамп и можат да се опишат како тероризам“.