Најмалку 32 лица се киднапирани на железничка станица во државата Едо, во јужна Нигерија, соопштија властите.
Меѓу одведените имало и персонал на станицата и патници кои го чекале возот.
Безбедносните сили со помош на локални ловџии започнаа акција за пребарување и спасување на жртвите, јавува Би-би-си.
Постои зголемена загриженост за нападите во земјата. Последниот инцидент се случи еден месец пред претседателските избори каде безбедноста е главното прашање на кампањата.
Во извештајот се вели дека во саботата група луѓе вооружени со АК-47 пукале во воздух додека влегле во станицата во Игубен, пред да ги грабнат патниците и персоналот и да ги одведат во блиската шума.
Некои од оние кои успеале да побегнат се здобиле со рани од куршуми, според очевидци.
Имало и жена со бебе, која наводно побегнала и го нашла патот до соседната заедница каде што била спасена.
Киднаперите ги пуштиле и двете деца бидејќи „се верувало дека чувствувале дека децата ќе им го забават движењето“, рекол локален жител, цитиран од весникот „Вангард“.
Портпаролот на владата на државата Едо, Крис Оса Нехикаре, рече дека многу луѓе почнале да го користат возот бидејќи локалниот пат стана „забранета зона, при што се собираат огромни откупнини од семејствата на жртвите (киднапираните).
Инцидентите на киднапирања за откуп, како и нападите врз заедниците од политички причини, се во пораст во Нигерија во последниве години.
Во декември, главната железничка линија што го поврзува главниот град Абуџа со северниот град Кадуна продолжи со работа девет месеци откако најмалку девет патници беа убиени во вооружен напад на железничката пруга.
Многу други беа земени како заложници, а последниот беше ослободен во октомври.
Несигурноста е едно од клучните прашања во кампањата пред општите избори во Нигерија во февруари кога ќе биде избран наследникот на претседателот Мухамаду Бухари.