Милиони домаќинства кои ги споделуваат своите сметки на Нетфликс со пријателите и семејството наскоро можеби ќе треба да платат значително повеќе за да се претплатат доколку Нетфликс објави укинување на споделувањето лозинки, што наводно е планирано за крајот на годината.
Според извештајот на Њујорк Тајмс, менаџментот на Нетфликс им објавил на своите вработени план за забрана на споделување лозинки во последните три месеци од 2022 година.
Нетфликс проценува дека речиси една третина од сите домаќинства што ја користат оваа услуга за стриминг имаат заедничка сметка платена од друго домаќинство.
„Со 222 милиони домаќинства кои плаќаат за нашата услуга за стриминг, проценуваме дека таа е споделена меѓу повеќе од 100 милиони дополнителни домаќинства“, рече Нетфликс во прегледот на кварталните податоци за заработка во април
Според извештајот објавен во вторникот, Netflix би сакал да воведе ново, поевтино ниво на претплата со реклами подоцна во текот на годината.
Гигантот за стриминг допрва треба да ги постави цените за дополнителните профили на домаќинствата за споделување лозинки.
Забраната за споделување лозинки треба да се имплементира така што на корисниците со повеќе профили, користени од луѓе на различни локации, не им се забранува тоа да го прават, туку ќе им се наплаќа повеќе за секој дополнителен корисник за кој Нетфликс заклучува дека не припаѓа на исто домаќинство.
Намерата на Нетфликс да ги зголеми претплатниците дојде откако услугата неодамна објави дека изгубила околу 200.000 претплатници во текот на првите три месеци од оваа година. Севкупно, на крајот на првиот квартал од оваа година, бројот на корисници на Netflix ширум светот падна на 221,6 милиони.