Израел ќе донесе свои одлуки за тоа како да се брани, изјави во средата премиерот Бенјамин Нетанјаху, додека западните земји повикаа на воздржаност како одговор на серијата напади од Иран.
САД, Европската унија и земјите од Г7 најавија дека планираат да размислат за построги санкции кон Иран, кои се сметаат за насочени кон смирување на Израел и убедување да ја ограничи неговата одмазда за првите директни напади на Иран по една деценија прокси конфликт.
Нетанјаху се состана со германскиот и британскиот министер за надворешни работи, кои отпатуваа во Израел како дел од координираните напори да се спречи конфликтот меѓу Израел и Иран да ескалира во регионален конфликт поттикнат од војната во Газа, пренесува Ројтерс.
Кабинетот на Нетанјаху соопшти дека тој им се заблагодарил на Дејвид Камерон и Аналена Баербок за нивната поддршка, велејќи им дека сака јасно да стави до знаење дека Израел ќе донесе свои одлуки и ќе направи се што е потребно за да се одбрани.
Претходно, Камерон рече дека сега е јасно дека Израел планира да возврати на иранските ракетни и беспилотни напади, кои Техеран ги започна во саботата како одговор на осомничениот израелски воздушен напад во кој загинаа воени офицери во сириската амбасада.
Баербок рече дека ескалацијата „нема никому да му служи, ниту на безбедноста на Израел, ниту на многуте десетици заложници кои се уште се во рацете на Хамас, ниту на луѓето од Газа, ниту на многуте луѓе во Иран кои самите страдаат под режимот, ниту трети земји во регионот кои едноставно сакаат да живеат во мир“.