Во голем руски ракетен напад врз централниот украински регион Дњепропетровск загинаа најмалку осум лица, повеќе од 25 беа ранети и оштетени клучни инфраструктурни објекти, соопштија локалните власти во петокот наутро, пренесува Ројтерс.
Украинскиот претседател Володимир Зеленски изјави дека нападот оштетил неколку ката од станбена зграда и железничка станица во главниот град на регионот Днепро и повика на дополнителна воздушна одбрана.
„Русија мора да биде одговорна за својот терор и секој проектил, секој Шахед (дрон) мора да биде соборен“, рече Зеленски. „Светот може да гарантира, а нашите партнери ги имаат потребните капацитети.“
Министерот за внатрешни работи Ихор Клименко изјави дека најмалку осум лица загинале во нападот, двајца во Днипро и шест во областа Синелникевски во овој регион, каде што биле оштетени повеќе од десет куќи.
Соборени се бројни проектили и дронови
Гувернерот на регионот, Серхи Лисак, за украинската телевизија изјави дека противвоздушната одбрана соборила 11 од 16 проектили и девет од десет беспилотни летала што го нападнале регионот.
Украинската државна железничка компанија „Укрзализниција“ соопшти дека Русија намерно ја таргетирала нејзината инфраструктура во овој напад, при што биле повредени нејзините работници. Компанијата ја затвори станицата во Днипро и ги пренасочи возовите што требаше да минуваат низ градот.
Русија негира дека цели на цивили, велејќи дека нејзините воздушни напади имаат за цел да ја „демилитаризираат“ Украина.
Воздухопловните сили на Украина соопштија дека собориле 15 проектили, вклучително и две крстосувачки ракети Kh-22 и 14 беспилотни летала за време на нападот во петокот.