Мештаните на босанското село Езеро се подготвуваат да го следат преносот на слетувањето на роверот на американската вселенска агенција НАСА на кратерот на Црвената планета, кој беше именуван по нивното село, преку видео бим во дворот на единственото училиште во селото.
Ќе биде тоа историски ден за 1.000 жители, кои се надеваат дека слетувањето на роверот Perseverance на езерото Кратер ќе им донесе некои земски награди.
Некои од нив гордо зборуваат за претстојниот настан, кој е прекрасен, што е вистинска реткост на место каде страдањата и сиромаштијата се вкоренети во војната во Босна во 90-тите години на минатиот век.
„Кога за првпат слушнав на телевизија дека НАСА именувала кратер на Марс по Езеро, се изненадив и помислив дека конечно нешто добро ни се случува. После повеќе години неволји, ова може да биде знак дека можеме конечно да одиме напред“, рече Милан Котањац, жител на Езеро.
„Тоа е многу важно за нашата општина, за нашиот народ“, додаде тој.
Многу селани се надеваат дека истражувањето на кратерот на Марс може да привлече повеќе посетители на зелената босанска долина покрај прекрасното езеро Плива.
Во 2019 година, НАСА ги информираше локалните власти за своите планови да именуваат кратер на Марс долг 45 километри во селото, бидејќи научниците веруваат дека кратерот некогаш имал езеро.
Во септември 2019 година, американскиот амбасадор во Босна и предаде на градоначалничката Снежана Ружичиќ писмо од директорот на НАСА за истражување на Марс, во кое се потврдува дека кратерот на Црвената планета го добил името по тоа село.
Роверот наречен Perseverance утре треба да слета на кратерот Езеро и да земе примероци за да ги донесе на Земјата.
Првично, имаше негативни реакции во босанското село, бидејќи луѓето стравуваа дека настанот може да го сврти вниманието од сериозните проблеми што беа нерешени толку години по војната, вклучувајќи ја сиромаштијата и недостатокот на можности за работа.
Повеќето луѓе едноставно се пошегуваа дека локалната власт „ќе ги однесе на Марс“.
Ружичиќ рече дека се надева оти новата слава ќе овозможи развој на проекти во областа, како што се младински кампови за истражување на вселената за деца од целата земја.