Сениорската кошаркарска репрезентација на Македонија денеска беше на прием во Општина Куманово.
Градоначалникот Максим Димитриевски оствари средба со делегацијата на македонската кошаркарска репрезентација, селекторот Марјан Илиевски и претседателот на Кошаркарската федерација на Македонија, Томица Главчев.
Средбата се одржа во салата на Општина Куманово, во пресрет на значајниот натпревар меѓу Македонија и Романија, кој ќе се одигра на 2 август во спортската сала Куманово.
Настанот, според Димитриевски, има повеќекратна симболика претставува почеток на претквалификациите за Светскиот куп во кошарка во 2027 година, свечено отворање на реновираната спортска сала, како и симболично одбележување на големиот државен празник Илинден.
– Имав огромна чест да се сретнам со нашите репрезентативци, стручниот штаб и раководството на федерацијата. Атмосферата веќе е полна со енергија, тимски дух и патриотизам, а репрезентацијата активно ги започна подготовките, изјави градоначалникот Димитриевски.
На состанокот се разговарало за организациските аспекти на натпреварот, логистичката поддршка од страна на општината и значењето што овој спортски настан го има за Куманово – не само како спортска, туку и како културна манифестација.
– Градот Куманово со гордост го пречекува овој настан и ги повикува сите љубители на спортот да дадат поддршка на нашите кошаркари во борбата за светскиот куп, порача Димитриевски.
Никола Ивановски