Белорускиот претседател Александар Лукашенко, сојузник на Москва, кој моментално е во посета на Кина, изјави во средата дека целосно го поддржува кинескиот план за решавање на конфликтот во Украина, кој беше претставен минатата недела.
– Белорусија активно води кампања за мировни предлози и целосно ја поддржува вашата иницијатива за меѓународна безбедност – рекол Лукашенко, цитира од неговата прес-служба, на средбата со кинескиот лидер Си Џинпинг.
Во петокот, токму на првата годишнина од војната, Пекинг објави документ од 12 точки со кој ги повикува Москва и Киев на мировни преговори.
Засега Москва и Киев не изразија сериозна волја за преговори и внимателно реагираа на кинескиот предлог.
Иако Кина сака да се позиционира како посредник во конфликтот, нејзината позиција како руски сојузник ја дисквалификува во очите на Западот.
Западните земји ја критикуваа Кина дека не ја осудува руската агресија, додека жестоко реагираа на неодамнешните тврдења на САД и НАТО дека размислува да и испрати оружје на Русија.
– Денешната средба се одвива во многу тежок период кој бара нови и невообичаени пристапи и одговорни политички одлуки. Пред се, нивната цел мора да биде избегнување на светски конфликт кој нема да има победник – рече Лукашенко.
Тој, исто така, ги пофали врските на неговата земја со Пекинг.
На состанокот со кинескиот премиер Ли Кечијанг претходно во средата, Лукашенко рече дека Пекинг и Минск „немаат затворени теми за соработка“.
– Соработуваме во сите области. Најважно е што никогаш не сме си поставиле задача да бидеме пријатели или да работиме против трети земји – рече Лукашенко.
– Убедени сме дека односите меѓу Белорусија и Кина ќе продолжат да напредуваат, надградувајќи го пријателството меѓу двете земји – рече Ли.
Белорускиот лидер ја нарече позицијата на Кина за украинската криза „сведоштво за нејзината мирољубива надворешна политика и нов и оригинален чекор што ќе има далекусежно влијание во целиот свет“, според кинеската државна новинска агенција Ксинхуа.
Си разговараше со Путин неколку пати од почетокот на војната, но не и со неговиот украински колега Володимир Зеленски.
Лукашенко ѝ дозволи на Русија да ја користи белоруската територија за да започне инвазија против Украина, а Киев изрази загриженост дека Минск може да обезбеди дополнителна поддршка на Русија во војната против Украина.
Сите информации поврзани со најновите случувања со војната во Украина можете да ги прочитате ТУКА.