Шефот на руската дипломатија Сергеј Лавров денеска ја осуди, како што рече, „опасната“ воена политика на САД и нивните јапонски и јужнокорејски сојузници кон Северна Кореја, по разговорите во Пјонгјанг со севернокорејските лидери.
„Ние, како и нашите севернокорејски пријатели, сме сериозно загрижени поради интензивирањето на воените активности на САД, Јапонија и Јужна Кореја во регионот и политиката на Вашингтон“, рече Лавров на прес-конференција.
Според него, Американците поставуваат стратешка инфраструктура во тој регион, вклучително и „нуклеарни елементи“.
Лавров не даде дополнителни објаснувања.
„Ние се спротивставуваме на ова опасно и неконструктивно однесување“, додаде тој.
Лавров, кој од вчера е во официјална посета на Северна Кореја, изјави дека Москва, Пекинг и Пјонгјанг се обидуваат „на конструктивен начин да предложат алтернативи за ескалација на тензиите во регионот“.
„Го поддржуваме воспоставувањето редовен преглед на преговорите за безбедносните прашања на Корејскиот полуостров, без предуслови“, изјави Лавров за новинарите.
Лавров дојде во Пјонгјанг во времето на зближување меѓу Москва и Пјонгјанг.
САД стравуваат дека Русија се обидува да добие оружје од Северна Кореја за нејзината офанзива во Украина.
Во септември, рускиот претседател Владимир Путин го прими севернокорејскиот лидер Ким Џонг Ун во посета на рускиот Далечен Исток, но Кремљ потоа даде гаранции дека „нема потпишан договор“.
Путин потоа ја прифати поканата за возвратна посета на Северна Кореја, но не беше одреден датум.
Според Кремљ, посетата на Лавров треба да ја подготви идната посета на Путин.
Контактите меѓу двете земји ќе продолжат, изјави денеска Лавров.