Рускиот министер за надворешни работи Сергеј Лавров изјави дека постои голема опасност САД и земјите од НАТО да се вклучат во директен вооружен конфликт меѓу нуклеарните сили.
„Веруваме дека ваквиот тек на настаните може и мора да се спречи. Затоа мораме да ги потсетиме сите на постоењето на огромни воени и политички ризици и да испратиме отрезнувачки сигнали до нашите противници“, рече Лавров во интервју за списанието „Межунарна жизњ“.
Тој изјави дека Русија смета дека нуклеарната војна би била неприфатлива и дека таа тргнува од премисата дека во таков конфликт не може да има победник.
„Затоа клучна задача е секоја нуклеарна држава да остане посветена на овие принципи и да биде максимално воздржана“, изјави шефот на руската дипломатија.
Тој додаде дека Брисел и Вашингтон започнале хибридна војна против Москва, како и дека Американците „користат и стапови и моркови за да ги спречат нашите партнери да се вклучат во економска и друга соработка со Русија“.
„Тие не се колебаа да користат субверзивни методи и да извршат саботажни акти, како што беше случајот со експлозијата на гасоводот „Северен тек“ под Балтичкото Море“, рече Лавров, јави Танјуг.
Тој рече дека Западот мора да разбере дека Русија ќе ги искористи сите средства за да ги брани своите луѓе и виталните интереси.
„Би било подобро нашите противници да сфатат дека конфронтацијата со Русија е залудна и да преминат на поцивилизирани, односно политички и дипломатски средства за постигнување рамнотежа на интереси“, рече Лавров.
Сепак, тој рече дека Соединетите Американски Држави не сакаат да заврши конфликтот во Украина и затоа постојано зборуваат за мировната формула на украинскиот претседател Володимир Зеленски.
Тој додаде дека Западот нема намера да разговара со Москва и дека тоа го покажале мултилатералните самити во Џеда и Копенхаген, на кои не биле поканети руски претставници.
Лавров изјави дека во моментов нема изгледи за преговори меѓу Москва и Западот за Украина бидејќи „западните спонзори продолжуваат да го туркаат Киев да ги зголеми влоговите“.
Сите информации поврзани со најновите случувања со војната во Украина можете да ги прочитате ТУКА.