Влијанието на социјалните мрежи врз младите е жешка тема бидејќи повеќето деца и тинејџери сакаат да прават што и да прават нивните пријатели, а родителите се грижат за поставувањето ограничувања.
Една нова студија испитува дали честото проверување на социјалните мрежи (Фејсбук, Инстаграм и Снепчет) е поврзано со промени во функционалниот развој на мозокот кај раните адолесценти, односно децата на возраст од 12 години.
Со помош на скенирања на мозокот, истражувачите од Универзитетот во Северна Каролина во Чапел Хил откриле дека честото „освежување“ и проверка на социјалните мрежи може да биде поврзано со промени во чувствителноста на мозокот на социјалните награди и казни, како што се лајкови или коментари на интернет.
„Знаеме дека адолесценцијата е еден од најважните периоди за развој на мозокот, бидејќи токму тогаш поминуваат најмногу промени“, вели авторката на студијата Ева Телцер, вонреден професор по психологија и невронаука.
„Тоа е навистина драматичен период за развој на мозокот, особено во деловите од мозокот кои реагираат на социјалните награди“, додава таа.
Сепак, социјалните награди не се ограничени само на користење на социјалните мрежи. Тоа може да биде и позитивен фидбек лице в лице од пријателите.
Но, токму лајковите на Фејсбук и другите платформи се сметаат за социјални награди, кои се чини дека имаат сè поголемо влијание врз животот на поединецот.
Истражувањето покажа застрашувачки резултати
Истражувањето исто така откри како некои адолесценти се речиси постојано на своите мобилни телефони, проверувајќи ги своите социјални мрежи секој час.
За тригодишното истражување, тим од експерти регрутираше 169 ученици од шесто и седмо одделение од три јавни средни училишта во рурална Северна Каролина, а учесниците беа расно различни и ги вклучуваа двата пола.
Учесниците пријавиле колку често ги проверувале трите платформи за социјално вмрежување, од помалку од еднаш дневно до повеќе од 20 пати.
Тие потоа биле подложени на снимање на мозокот, а она што научниците се обиделе да го разберат е како нивниот мозок реагира на позитивни или негативни коментари на социјалните мрежи, но и воопшто на прелистувањето на овие платформи.
Децата стануваат сè почувствителни на повратните информации од нивните врсници
Децата кои на 12-годишна возраст ги проверувале социјалните мрежи повеќе од 15 пати на ден, покажале значителни разлики во начинот на кој нивниот мозок се развивал во следните три години, пренесува US News.
Професорот и автор на студијата рече дека добиените резултати покажуваат дека тинејџерите кои растат постојано проверувајќи ги социјалните мрежи стануваат пречувствителни на повратните информации од нивните врсници.
„Во текот на тие години, нивниот мозок реагира се повеќе и повеќе на повратните информации за социјалната награда што ја очекуваат, и тие се сè повеќе подложни на мислењата на другите луѓе“, објаснува Телцер, кој додава дека тоа може да биде многу опасно и да резултира со зголемена ризик од депресија, анксиозност и други ментални нарушувања кај децата и младите.