Сепаратистите под контрола на Русија во четири окупирани региони на Украина одржаа референдуми за приклучување кон Русија од 23 до 27 септември.
Руските медиуми објавија дека големо мнозинство гласало за приклучување кон Русија, додека Украина и западните земји го осудија неговото одржување и резултатите ги нарекоа ништовни.
Експертите сметаат дека овие референдуми може да доведат до ескалација на седуммесечната војна.
„Суверена руска територија“
Референдуми се одржаа во самопрогласените републики Доњецк и Луганск во регионот на Донбас, кои рускиот претседател Владимир Путин ги призна како независни непосредно пред да испрати војници во Украина и да започне инвазија.
Се гласаше и во јужниот регион Херсон, кој беше освоен од руските војници во раните денови на војната, како и во областа Запорожје, која делумно е под контрола на Русија.
Во телевизиското обраќање минатата среда, Путин нареди делумна мобилизација и рече дека ќе ја признае одлуката на граѓаните на референдумот.
– Ја поддржуваме одлуката на мнозинството граѓани во Доњецк, Луганск, Херсон и Запорожје – рече тој.
Шефот на Херсонската област, назначен од Русија, Владимир Салдо, рече дека нејзиното вклучување во Русија „ќе ја обезбеди нашата територија и ќе ја врати историската правда“.
Големи делови од Запорожје и Доњецк не се под руска контрола, а сите четири региони се соочија со интензивни борби во последните денови.
Се очекува Путин да ги анектира четирите региони во деновите по референдумот, јавува Би-Би-Си.
Со анексијата на овие делови, Украина, заедно со Крим, целосно би го изгубила пристапот до Азовското Море.
Некои аналитичари сугерираат дека промената ќе ѝ овозможи на Русија да тврди дека континуираниот контранапад на Украина врз четирите региони ќе биде напад на суверена руска територија.
Кој што контролира во Украина?
Русија нема целосна контрола врз ниту еден од четирите региони.
Русија контролира повеќе од 90.000 квадратни километри или околу 15 отсто од вкупната територија на Украина – со големина на Португалија или Јордан.
Русија го анектираше Крим во 2014 година. Со Крим и територијата на четири други региони, Русија ќе добие контрола на област приближно со иста големина како и американската држава Пенсилванија.
Ако Русија ги присвои овие четири региони, тогаш, од перспектива на Русија, Украина, а веројатно и нејзините западни сојузници, би се бореле против самата Русија.
Тоа би довело до зголемување на ризикот од директна воена конфронтација меѓу Русија и воената алијанса на НАТО.
Тоа е сценарио за кое американскиот претседател Џо Бајден рече дека може да доведе до Трета светска војна, бидејќи членките на НАТО испраќаат оружје и разузнавачки информации во Украина.
Руската нуклеарна доктрина дозволува употреба на такво оружје доколку е нападната со нуклеарно или друго оружје за масовно уништување или ако руската држава се соочи со егзистенцијална закана од конвенционалното оружје.
Сите информации поврзани со најновите случувања со војната во Украина можете да ги прочитате ТУКА.