Единственото државно училиште во Куманово од денеска е и единствено кое изведува настава, додека вработените во останатите средни и основни училишта продолжуваат со штрајк.
Како што информираше денеска претседателот на Регионалниот одбор на СОНК, Никола Стојмановски, штрајкот во оваа училиште е прекинат и од денеска се изведува настава.
Стојмановски рече дека бил известен од штрајкувачкиот одбор дека им биле барани писмени изјави на вработените да се изјаснат за прекин на штрајкот.
– Од директорката имаше изјава на Фејсбук каде ги повикува учениците да си дојдат на настава, училиштето ја организира наставата и тоа е во ред, во законски активности на директорот кој е должен да го организира процесот на настава. Колеги одреден број имаат дадено такви изјави и оние кои се во штрајк делумно ги потполниле тие изјави и почнува наставата, како ќе се одвива наставата во тоа државно училиште не знам, бидејќи на состанокот бев известен од претседателот на штрајкувачкиот одбор дека во текот на денот денеска по состанок на регионот ќе одржи состанок со членовите кои се во штрајк и ќе донесат одлука, изјави Стојмановски.
Иако вчера имало одлуки и кај други одбори да се прекине штрајкот, по изјаснувањето на СОНК, сепак денеска одлучиле да не изведуваат настава.
Во целиот Североисточен регион штрајк нема во по едно училиште во Крива Паланка и Кратово, од денеска во ДСУ „Киро Бурназ“, а на работа од денеска се вратени и градинките.
Вкупно штрајкуваат 34 синдикални организации од целиот регион.
Никола Ивановски