Кина не може да го прифати планот на Светската здравствена организација (СЗО) за спроведување на втората фаза од студијата за потеклото на коронавирусот, изјави денеска висок кинески здравствен службеник.
Зенг Јиксин, потпретседател на Националната здравствена комисија на Кина, рече дека е изненаден од планот за тестирање на потеклото, а особено од теоријата дека вирусот можел да протече од кинеска лабораторија.
Тој ја отфрли таквата теорија како гласина што е спротивна на здравиот разум и науката.
„Невозможно е да прифатиме таков план за откривање на потеклото“, рече Зенг на прес-конференција свикана да разговара за потеклото на КОВИД-19.
Потрагата по потеклото на вирусот стана дипломатско прашање што ги влоши односите на Кина со САД и многу американски сојузници.
Соединетите Американски Држави и некои други земји тврдат дека Кина не била транспарентна за тоа што се случило во првите денови од пандемијата, додека Кина ги обвинува критичарите за политизирање на прашања што треба да им бидат оставени на научниците.
Шефот на Светската здравствена организација Тедрос Аданом Гебреизус минатата недела призна дека е премногу рано да се исклучи потенцијалната врска помеѓу пандемијата Ковид-19 и протекувањето на вирусот од лабораторијата и ја повика Кина да биде потранспарентна бидејќи научниците го бараат потекло од коронавирусот.