Јужна Кореја денеска ја лансираше својата прва вселенска ракета од домашно производство, според снимките објавени на телевизија, неколку месеци по неуспешниот прв обид во октомври, пренесе агенцијата АФП.
Корејската ракета за лансирање на сателитот, на течно гориво од 200 тони, официјално наречена Нури, полета од полигонот Гехеунг во 16.00 часот по локално време (9.00 часот по средноевропско време).
Коментаторот рече дека „се чини дека сè оди според планот“. Резултатите ќе бидат официјално објавени подоцна денеска.
Во првиот обид во октомври пробниот товар ја достигна саканата висина од 700 километри, но не влезе во орбитата бидејќи моторот на третата фаза на ракетата изгоре порано од планираното, пренесува агенцијата АП.
Доколку денешното лансирање биде успешно, Јужна Кореја ќе стане десеттата земја во светот која лансира сателит во вселената со сопствена технологија.
Јужна Кореја, десеттата по големина економија во светот, е главен снабдувач на полупроводници, автомобили и паметни телефони на светските пазари. Сепак, нејзината вселенска програма заостанува зад азиските соседи Кина, Индија и Јапонија.
Соседната Северна Кореја ги постави своите први сателити за набљудување на Земјата во орбитата во 2012 и 2016 година, иако нема докази дека некој од нив некогаш емитувал слики од вселената или испратил податоци назад на земјата.
Северна Кореја доби економски санкции од ОН за лансирањето на тие сателити бидејќи се сметаше за прикриен тест на забранетата ракетна технологија со долг дострел.
Јужна Кореја испрати сателити во вселената од раните 1990-ти, но сите од локациите за лансирање во странство или ракета изградена со странска технологија. Во 2013 година, за прв пат успешно лансираше сателит од своето поле, но првата фаза од ракетата за лансирање беше произведена во Русија.
Успешното лансирање денес ќе ги поттикне растечките вселенски амбиции на Јужна Кореја, но исто така ќе докаже дека има клучни технологии за изградба на систем за набљудување базиран на вселената и поголеми ракети за време на непријателствата со ривалската Северна Кореја, велат некои експерти.