Јужна Африка денеска го повика Меѓународниот суд на правдата (МСП) да издаде необврзувачко правно мислење дека израелската окупација на палестинските територии е нелегална, тврдејќи дека тоа ќе помогне да се реши конфликтот во Појасот Газа.
Во текот на вториот ден од сослушувањата во МСП, претставниците на Јужна Африка побараа судот да предложи одлука за формирање на две држави, односно формирање на држава Палестина, како дел од советодавното мислење, пренесува Ројтерс.
Од 15-члениот панел на МСП, исто така, беше побарано да ја разгледа „окупацијата, населувањето и анексијата“ на Израел, вклучувајќи мерки насочени кон промена на демографскиот состав, карактерот и статусот на Светиот град Ерусалим, како и усвојувањето на поврзани дискриминаторски закони и мерки.
Израел не присуствува на сослушувањата, но испрати писмено соопштение во кое се вели дека советодавното мислење ќе биде штетно за постигнување договор со Палестинците.
На вчерашното рочиште, палестинските претставници побараа од МСП да ја прогласи окупацијата на Израел на нивната територија за нелегална, велејќи и дека советодавното мислење на судот може да придонесе за решение со две држави и траен мир.
Расправата уследи по барањето на Генералното собрание на ОН во 2022 година за советодавно, односно необврзувачко мислење на МСП за окупацијата на палестинските територии, пренесува Танјуг.