Израел извршил геноцид во Газа, тврдат две водечки израелски организации за човекови права – Б’Тселем и Лекари за човекови права.
Нивните извештаи, објавени од „Гардијан“, детално опишуваат како израелската војска систематски ги таргетира цивилите само затоа што се Палестинци, со цел уништување на палестинското општество и идентитет.
Премиерот Бенјамин Нетанјаху се соочува со зголемен притисок, и внатрешно и надворешно.
Крајната десница во неговата влада бара продолжување на војната, додека илјадници Израелци излегуваат на улиците секој ден за да протестираат против уништувањето на Газа.
Според британскиот „Телеграф“, десетици израелски војници одбиваат да извршуваат наредби – тие одбиваат да учествуваат во операции против цивили, што претставува речиси невиден преседан во историјата на израелските вооружени сили.
Исто така, се наведува дека само околу 60% од поканетите одговараат на воените покани.
Сè повеќе резервисти одбиваат да се покорат
Рон Финер, 26, офицер во елитната 933-та бригада Нахал, отсекогаш сонувал да ги следи стапките на својот татко и да стане офицер во израелската армија. Сепак, денес тој одбива да се врати како резервист, бидејќи не сака да биде распореден во Газа.
Шокиран од обемот на конфликтот и смртта на повеќе од 59.000 Палестинци, тој одлучи да ја одбие наредбата и беше осуден на 25 дена затвор.
„Кога повторно започна бомбардирањето на Газа, ми стана јасно дека владата не сака оваа војна да заврши – туку да ја продолжи по секоја цена. Тогаш сфатив дека не можам да се вратам во униформа“, рече Финер.
Сè повеќе млади Израелци се обидуваат да избегнат воена служба, наведувајќи здравствени проблеми или семејни причини.
Финер верува дека ширењето фотографии од гладни деца во Газа дополнително ќе го намали бројот на оние кои се подготвени да одат во војна.
Дури и меѓу високите офицери – активни и пензионирани – отпорот кон продолжувањето на војната предводена од Нетанјаху расте, пишува Телеграф.
Нема јасна воена цел
Генералот Асаф Орион, поранешен раководител на стратешко планирање во израелската армија (ИДФ), вели дека имало јасни воени цели во операциите против Иран и Хезболах во Либан.
Но, во Газа, тврди тој, повеќе нема такви цели.
„Главната причина зошто оваа војна сè уште трае е од политичка природа“, оценува Орион.
Уште подиректен е Еран Ецион, поранешен заменик-претседател на Советот за национална безбедност на Израел.
Тој тврди дека повеќето Израелци разбираат дека војната во Газа повеќе не се води против Хамас, туку е продолжена исклучиво поради политичките, личните и судските интереси на Бенјамин Нетанјаху.
„На Нетанјаху му е потребна војната за да остане на власт. Ако конфликтот престане, многу веројатно ќе ја изгуби поддршката на ултранационалистите во коалицијата – а со тоа и власта“, вели Ецион.