Израелската армија урна училиште на окупираниот Западен Брег, врз основа на пресудата со која се потврдува долгогодишната наредба за протерување на жителите од осум палестински села во областа, соопшти израелска група за човекови права.
B’Tselem, група за човекови права, рече дека учениците биле во училниците кога војниците пристигнале да ги урнат.
На видеото од таа група се гледа како булдожер урива еднокатна училишна зграда додека војниците чуваат стража.
Во мај, израелскиот Врховен суд пресуди против семејствата во областа Масафер Јат, отворајќи го патот за потенцијално раселување на најмалку 1.000 луѓе.
Групите за човекови права велат дека Израел врши постепено уривање на зградите во областа.
Во раните 1980-ти, војската ја прогласи областа за зона за борбена обука. Израелските власти тврдеа дека жителите ја користеле областа само за сезонско земјоделство и дека во тоа време немале постојани згради таму.
Во ноември 1999 година, безбедносните сили протераа 700 селани и уништија куќи и резервоари за вода, а судската битка започна следната година.
Во мајската пресуда, Врховниот суд застана на страната на државата и рече дека земјоделците го отфрлиле компромисот што би им овозможил да влезат во областа за да одгледуваат дел од годината.
Семејствата велат дека биле таму со децении, долго пред Израел да го заземе Западниот Брег во војната во 1967 година.
Тие се занимаваат со традиционална форма на пустинско земјоделство и сточарство, а некои живеат во пештери барем дел од годината, но велат дека единствените домови им се во населбите кои сега се рушат.