Израелските одбранбени сили (ИДФ) изразија жалење за убиството на либански војник во нападот врз цел на проиранскиот Хезболах во вторникот.
Според израелските медиуми, армијата ретко изразува жалење за вакви инциденти.
До вторник, ниту еден либански војник не беше убиен во прекугранични судири меѓу израелската армија и Хезболах.
На либанско-израелската граница размената на оган е интензивирана од 7 октомври, кога започна војната меѓу Израел и палестинскиот Хамас, кој владее со Појасот Газа.
Израелските сили најчесто реагираат на нападите на либанскиот екстремистички Хезболах, бидејќи расте загриженоста дека војната може да се прошири.
Либанската армија соопшти дека „израелски непријател“ бомбардирал воена позиција во областа Адајше и дека еден војник загинал, а тројца се ранети.
ИДФ синоќа соопшти дека силите се обидуваат да ја „неутрализираат заканата“ долж границата.
„Либанските воени сили не беа цел на нападот. ИДФ жали за инцидентот и ќе го истражи“, се вели во соопштението на израелската армија.
Коментирајќи ја смртта на либански војник, мировната мисија на ОН во Либан (УНИФИЛ) објави дека „либанските вооружени сили не учествуваат во конфликтот со Израел“, оценувајќи дека во последните денови е забележан брз и алармантен пораст на насилството. и апелираше да се прекине тој циклус.
Од почетокот на прекуграничната размена на оган, повеќе од 110 луѓе се убиени на либанска страна, главно борци на Хезболах и повеќе од десет цивили, според агенцијата Франс прес.
Хезболах го потврди убиството на 79 свои членови. Шест војници и тројца цивили загинаа на израелска страна.