Ирскиот премиер Лео Варадкар во средата објави дека се повлекува од функцијата премиер и лидер на владејачката партија Фин Гаел од лични и политички причини.
„Денеска поднесувам оставка како претседател и лидер на партијата Фин Гаел и ќе поднесам оставка од функцијата премиер штом мојот наследник ќе ја преземе функцијата“, изјави Лео Варадкар на новинарите собрани пред владините згради во Даблин.
Заминувањето на Варадкар од раководството на трипартиската коалиција нема автоматски да доведе до избори.
Тој рече дека побарал нов претседател на партијата да се избере на 6 април, за да се овозможи избор на нов премиер по враќањето на парламентот од велигденските празници.
Во емотивниот говор, Варадкар рече дека е вистинското време да се повлече и дека нема „вистинска причина“ зад неговата одлука.
„Не планирам ништо друго, немам ништо на ум. Немам конкретни лични или политички планови“, рече тој.
Во 2017 година, Варадкар стана првиот отворено геј премиер во некогаш цврсто католичката земја и најмладата личност на оваа функција.
Тој се врати на премиерската функција во 2022 година според договорот за ротација помеѓу Фајн Гаел и Фиана Фаил, најголемите партии во трипартиската коалиција со помалата Зелена партија.
Следните избори треба да се одржат на почетокот на 2025 година.
Кандидати да го наследат Варадкар како лидер на Фајн Гаел се министерот за високо образование Сајмон Харис кој беше министер за здравство за време на пандемијата „Ковид-19“, министерот за претпријатија Сајмон Ковени, министерот за јавни расходи Пашал Донохое и министерот за правда Хелен Мекенти.