Ирската економија оваа година ќе забележи раст од 3,4 отсто и покрај пандемијата на коронавирусот, процени Институтот за економски и социјални истражувања (ЕСРИ).
Проценката е подобра благодарение на „значителното закрепнување“, потпирајќи се во голем дел на силниот извоз, соопшти независниот истражувачки институт.
Следната година економијата во Ирска, според нивните проценки, би требало да се зголеми за 4,9 проценти.
– Позитивната стапка на раст на домашната економија оваа година е вистинско достигнување, но ирскиот пазар на труд веројатно уште некој период ќе бележи високи стапки на невработеност, изјави главниот автор на извештајот, Киран Квин.
Стапката на невработеност во Ирска се зголеми над 20 проценти во четвртиот квартал, како одраз на намалената домашна потрошувачка поради затворањето на малопродажбата и услугите со цел да се спречи ширењето на Ковид-19.
Институтот проценува дека „веројатно“ ќе остане над 10 проценти до крајот на 2021 година. Во февруари оваа година, пред да се затворат продавниците, рестораните и да се откажат другите услуги, таа изнесуваше 4,8 проценти.
Очекувањата на институтот се засноваат на претпоставка за шестнеделно заклучување на почетокот на следната година и договорот меѓу Велика Британија и ЕУ за односите по Брегзит. Доколку не се постигне договор, ирската економија ќе забележи раст само 1,5 проценти во 2021 година, проценува институтот.
Габриела Точко