Бугарските власти пуштаат полициски кучиња врз бегалците од Блискиот Исток и користат други насилни методи за илегално да ги протераат од земјата назад во Турција, соопшти организацијата за човекови права Хјуман рајтс воч (ХРВ).
Според ХРВ, мигрантите пријавиле дека полицијата тепала, ограбила и им ја соблекла облеката.
„Бугарските власти брутално и накратко ги протеруваат мигрантите и барателите на азил преку копнената граница со Турција“, изјави Мишел Рандава, службеник за правата на бегалците и мигрантите во ХРВ.
Таа истакна дека Европската унија треба да обезбеди Бугарија веднаш да престане со незаконските и нехумани туркања (протерувања) на нејзините граници и да им дозволи на барателите на азил пристап до правични процедури за азил.
Бугарската влада не одговори на извештајот на ХРВ, но официјални лица претходно негираа малтретирање на мигрантите.
Human Rights Watch интервјуираше 15 Авганистанци од ноември до април, кои изјавија дека биле „жртви на 19 турканици на бугарските власти од Бугарија во Турција“.
Бугарското Министерство за одбрана во ноември објави дека распоредило војници и воени возила долж границата со Турција за да и помогне на полицијата да се справи со големиот број бегалци кои се обидуваат да влезат во земјата.
Бугарија е на балканската рута што ја користат бегалците од Блискиот Исток и Авганистан за да стигнат до Европа.
Мал дел од нив сакаат да останат во таа, најсиромашната земја во Европската унија, а всушност ја користат Бугарија за транзит кон запад.