Напади, вклучително и пукање во кое беше убиен водач на банда, избувнаа во главниот град на Хаити, Порт-о-Пренс, додека политичките групи се чини дека се приближуваат кон финализирањето на преодниот совет за преземање на власта од отсутната влада, пренесува Хина.
Водачот на бандата „Делмас 95“, Ернст Џулме, познат како Ти Грег, е убиен во полициска операција еден ден откако беше убиен уште еден водач на банда, потврдија полицијата и изворите.
Смртта на Џулме, член на сојузот Вив Ансанм на водачот на бандата Џими „Скара“ Шеризиер, симболично го означува неуспехот на бандата да заземе голем дел од градот.
Џулме неодамна во масовно бегство побегна од најголемиот затвор на Хаити.
Генералниот секретар на Обединетите нации, Антонио Гутереш го поздрави извештајот дека политичките групи ги избрале сите членови на преодниот совет, кој ќе ги преземе претседателските овластувања пред идните избори, изјави портпаролот на ОН.
Скршена политичка класа на Хаити
Советот, кој има за цел да ја обедини скршената политичка класа на Хаити, треба да именува замена за премиерот Ариел Хенри, кој ја објави својата оставка на 11 март бидејќи насилството на бандите го спречи да се врати во земјата.
„Генералниот секретар ги поздрави извештаите дека сите учесници на Хаити именувале претставници во Преодниот претседателски совет“, рече заменик-портпаролот на ОН Фархан Хак на брифингот за медиумите.
Планот за транзиција, кој беше усвоен во Јамајка, беше со посредство на Карипската меѓувладина заедница (CARICOM), заедно со претставници на владата на Хаити и опозицијата.
CARICOM објави список на политички групи кои ќе бидат претставени во Советот.
Деветчлениот совет се очекуваше да се собере во рок од неколку дена по оставката на Хенри, но некои политички фракции на Хаити не можеа да се обединат зад еден претставник.
Една партија го отфрли планот, а потоа се повлече, додека групите изоставени од планот го критикуваа враќањето на политичарите од претходните администрации кои се сметаа за корумпирани.
Закана за одмазда
Шеризиер се закани со одмазда на политичарите и нивните семејства доколку учествуваат во предложениот совет.
Како што се чини дека советот е при крај, во четвртокот се слушнаа силни пукотници во близина на Националната палата на плоштадот Шам де Марс во центарот на Порт-о-Пренс, а луѓето избегаа од пукотниците во предградието на главниот град Петион-Вил.
Во средата, осомничените членови на бандата во Петион-Вил, кој беше нападнат во последните денови, беа убиени и запалени – вклучително и водач познат како Макандал – во нешто што изгледаше како оживување на цивилното движење за одмазда познато како Бва Кале.
Локалните медиуми објавија уште едно убиство од страна на Бва Калеа надвор од главниот град во четвртокот, иако Ројтерс не можеше да го потврди тоа.
Државните институции беа главно отсутни за време на насилството, а полицијата е лошо опремена против тешко вооружените криминални групи кои сакаат да ја прошират својата територијална контрола над главниот град.
Плановите за меѓународна безбедносна мисија, што Хенри ги побара во 2022 година, остануваат во мирување.
Распоредување на меѓународни сили
Фархан Хак рече дека брзото распоредување на меѓународните сили е клучно за подобрување на политичката и безбедносната ситуација.
Тој рече дека ОН ќе го поддржат обновувањето на демократските институции на Хаити и повика на заштита на цивилите.
ОН и другите меѓународни тела и амбасади го евакуираат персоналот и другите странци со хеликоптери бидејќи главниот аеродром на Хаити е небезбеден.
Канадската влада соопшти доцна во четвртокот дека канадските вооружени сили соработуваат со канадската амбасада на Хаити за да помогнат во планирањето на вонредни ситуации.
Таа не даде детали, но соопштението дојде како одговор на извештаите дека канадски војници биле пренесени за да ја заштитат канадската амбасада.
Американската влада во четвртокот организираше заминување на 90 американски граѓани од градот Кап-Хаитиен на северот на Хаити во Мајами, како и од Порт-о-Пренс во Доминиканската Република, покрај 70-те што заминаа оттогаш.