Директорот на Меѓународната агенција за атомска енергија (МААЕ), Рафаел Гроси, денеска за време на неговата посета на Иран предупреди дека просторот за дипломатија се намалува, поради напредокот на иранската нуклеарна програма додека беснеат војни на Блискиот Исток и со враќањето на претседателот Доналд Трамп во Белата куќа во Вашингтон.
Говорејќи на прес-конференција со Мохамед Еслами од Организацијата за атомска енергија на Иран, Гроси истакна дека додека МААЕ и Иран продолжуваат да преговараат, времето не е на нивна страна.
„Фактот што постојат меѓународни и регионални тензии покажува дека просторот за преговори и дипломатија не се зголемува, туку се намалува“, рече Гроси.
„Неопходно е во овој момент да добиеме конкретни, опипливи и видливи резултати кои ќе укажат дека оваа заедничка работа ја подобрува ситуацијата, ги разјаснува работите и оди подалеку од конфликти и војна“, рече тој.
Гроси беше во посета на Техеран во обид да го врати пристапот на инспекторите до програмата на Иран, како што имаше во претходните патувања, иако со ограничен успех, откако Трамп еднострано ги повлече САД од иранскиот нуклеарен договор со светските сили.
Од раскинувањето на договорот во 2018 година, Иран се откажа од сите ограничувања на својата програма и збогатува ураниум до 60 проценти чистота, блиску до нивото на оружје од 90 проценти.
Иран им забрани на некои од инспекторите на агенцијата. Иранските власти, исто така, се повеќе се закануваат дека би можеле да направат атомско оружје, нешто за што Западот и МААЕ се загрижени со години откако Техеран се откажа од организираната програма за оружје во 2003 година.