Управата за финансиска полиција денеска, под раководство на надлежен јавен обвинител, спроведе голема акција во која беа извршени претреси на повеќе локации на подрачјето на Липково, Куманово и Желино.
При акцијата од слобода се лишени седум лица, кои веднаш биле изведени пред судија на претходна постапка при Основниот кривичен суд, додека едно лице засега не е достапно на органите на прогонот.
Операцијата следи по двегодишна предистражна постапка што ја водела Управата за финансиска полиција во координација со Основното јавно обвинителство за гонење на организиран криминал и корупција.
– Се работи за сложена предистрага која опфаќа повеќе правни и физички лица, а целта е целосно разоткривање на криминална група која дејствувала подолг временски период. Групата е осомничена за сторување на кривични дела ‘Злосторничко здружување’, ‘Даночно затајување’, ‘Даночна измама’ и ‘Перење пари и други приноси од казниво дело’, со кои се стекнала со противправна имотна корист од над 430 милиони денари и со тоа предизвикала огромна штета на државниот буџет“, соопштија од Управата.
Во акцијата учествуваа и припадници на специјалната единица САЕ „Тигар“, а истрагата за целосно расветлување на случајот продолжува.
Никола Ивановски