Координативно тело за интелектуална сопственост при Владата на Република Македонија утринава изврши повеќе контроли низ неколку објекти во Куманово, по претходен акционен план и пријави доставувани од страна на правни субјекти при што се запленети фаслификувани тренерки, како и компјутери без лиценциран оперативен систем.
Инспекторите одзеле вкупно 35 компјутери од три правни субјекти, од кои едно итернет-кафе, поради тоа што немале лиценциран софтвер. Од страна на МВР ќе им бидат поднесени кривични пријави, а УЈП и Државниот пазарен инспекторат ќе превземат свои мерки со глоби кои се движат и до 10 илјади евра.
Во два бутика во центарот на градот исто така инспекторите забележале повреда на индустриска сопственост за познати трговски марки, заштитени на светско ниво, при што биле одземени неколку ташни од брендовите Мајкл Корс и против нив исто така ќе бидат поднесени соодветни пријави.
Предмет на контрола бил и зелениот пазар каде се одземени Адидас, Најк и Пума тренерки кои биле пронајдени на дел од тезгите.
Претседателот на Координативно тело за интелектуална сопственост, Мите Костов изјави дека ваквите акции ќе продолжат да се спроведуваат со цел да се сузбие пиратеријата во Република Македонија.
Ние како координативно тело и сите институции кои учествуваат во координативното тело продолжуваме со нашите силни напори за сузбивање на пиратеријата, корупцијата и девијациите од тој општествено-економски систем и се надевам дека ова ќе стигне до другите фирми, затоа што ако денеска не сме ги искотролирале сите во една блиска иднина пак ќе ги контролираме – додаде Костов.
Во акцијата биле исконтролирани три кабловски оператери во Куманово кои реемитуваат програми, но инспекторите не наишле на неправилности во нивното работење, затоа што ги имале сите авторски права за емитување телевизиски канали.
Со одредбите од Законикот на Република Македонија кршењето на авторски права со себе носи кривична одговорност и можност за казна затвор од три до шест години.