Порт-о-Пренс го зазеде првото место на морничавата ранг-листа, бидејќи годишно во престолнината на Хаити има над 4.000 убиства.
Според податоците подготвени од мексиканската невладина организација „Граѓански совет за јавна безбедност и правда“, ранг-листата на 50-те најопасни градови во светот е доминирана од Мексико, Бразил, Колумбија и САД.
Просечниот број на убиства во овие 50 градови е речиси девет пати поголем од светскиот просек.
Првото место на оваа листа му припаѓа на главниот град на Хаити, Порт-о-Пренс. Истражувачите на мексиканската организација истакнуваат дека овој град е совршен пример за тоа што се случува кога криминалните групи ја преземаат контролата.
Истражувањата покажуваат дека повеќе од 80 проценти од градовите во Хаити се под контрола на банди, додека формалната влада во тие области повеќе не постои.
Важно е да се напомене дека дури 20 од 50-те градови на листата се наоѓаат во Мексико, што сочинува 40 проценти од вкупната листа.
На листата се вклучени и осум бразилски градови, шест од Колумбија, по пет од Јужна Африка и САД, три од Еквадор и Хаити. Јамајка и Тринидад и Тобаго се претставени со по еден град.
Во градовите вклучени во оваа листа се регистрирани вкупно 40.198 убиства, додека вкупниот број на жители е 70,7 милиони. Овој број на убиства сочинува 8,2 проценти од сите убиства во светот.