Бројот на деца кои се соочуваат со тешка акутна неухранетост во Сомалија надмина половина милион, што е повеќе отколку во 2011 година кога десетици илјади деца умреа од глад, соопштија денеска Обединетите нации.
„Повеќе од половина милион деца се соочуваат со последици што може да се спречат. Тоа е вистински кошмар“, рече Џејмс Елдер, портпарол на УНИЦЕФ на прес-конференција во Женева, додавајќи дека таква ситуација не е видена во ниту една земја во овој век.
Според податоците на УНИЦЕФ, повеќе од 700 деца починале во нутриционистичките центри низ земјата чии капацитети биле максимално исполнети.
Се проценува дека повеќе од 513.000 деца на возраст под пет години страдаат од акутна неухранетост, што значително го зголемува ризикот од смрт од болести како што се мали сипаници, маларија и колера кои се шират во земјата, пренесува Ројтерс.
ОН предупредуваат дека делови од Сомалија ќе бидат погодени од глад во наредните месеци, поради петтата последователна сезона без дожд во регионот на Рогот на Африка.
Гладот во Сомалија однесе повеќе од четвртина милион животи во 2011 година, од кои половина беа деца.