Два германски воени брода чекаат наредба од Берлин за да утврдат дали ќе бидат првите поморски бродови што ќе поминат низ тајванскиот теснец по повеќе од 10 години следниот месец, изјави денеска за Ројтерс командантот на германските поморски наменски сили Аксел Шулц.
„Одлуката сè уште не е донесена. Овде го покажуваме нашето знаме за да покажеме дека стоиме со нашите партнери и пријатели, нашата посветеност на поредок заснован на правила, мирно решавање на територијалните конфликти и слободни и безбедни транспортни рути“, рече Шулц.
Тој додаде дека не планира никакви посебни безбедносни мерки доколку воените бродови под негова команда го преминат Тајванскиот теснец, нарекувајќи го „нормален премин“ сличен на пловењето низ Ла Манш или Северното Море.
Сепак, како што рече, очекува секој премин внимателно да се следи.
„Очекувам кинеската морнарица и потенцијално крајбрежната стража или поморската милиција да не следат“, рече тој, опишувајќи го ова како вообичаена практика.
Фрегатата Баден-Виртемберг ќе учествува и на вежби во регионот со Франција, Индонезија, Италија, Јапонија, Малезија, Сингапур, Филипини и САД.
Додека САД и другите нации, вклучително и Канада, испратија воени бродови низ спорниот теснец во последниве недели, тоа ќе биде првиот премин на германската морнарица низ теснецот од 2002 година.
Кина тврди дека има суверенитет над Тајван и вели дека има јурисдикција над воден пат широк речиси 180 километри што ги дели двете страни и е дел од Јужното Кинеско Море.
Во текот на изминатите четири години, кинеската војска ги зголеми своите активности во теснецот.
Германија, на која и Кина и кинескиот регион Тајван, со нејзината индустрија за чипови, се главни трговски партнери, им се придружи на другите западни земји во проширувањето на своето воено присуство во регионот бидејќи нивната тревога порасна поради територијалните амбиции на Пекинг, пренесува Танјуг.