Лидерите на француската левичарска коалиција ќе бараат од претседателот Емануел Макрон да им дозволи да формираат нова влада за време на серијата состаноци посветени на решавање на шестнеделниот политички ќорсокак.
Макрон претходно го отфрли кандидатот на Новиот народен фронт (НФП) за мандатот, велејќи дека сака владин лидер со „широка и стабилна“ поддршка за да избегне гласање за недоверба во парламентот што би предизвикало дополнителен политички хаос, пишува Гардијан.
Претставниците на НФП го обвинија претседателот за одложување на назначувањето на нов премиер, како и дека неговата „неактивност е сериозна и штетна“ бидејќи не ги прифаќа резултатите од предвремените избори што ги распиша.
Страните се поканети во Елисејската палата каде ќе се одржат консултации за да се придвижат работите.
Макрон денеска треба да се сретне со претставниците на НФП, левичарска коалиција формирана за да ја спречи заканата од победа на екстремната десница и Националното собрание во вториот круг од изборите.
Коалицијата составена од левичарската Франција Неосвоена (ЛФИ), Социјалистичката партија, Зелените и комунистите претходно ја предложи Луси Касте за премиер, што Макрон го одби.
Претседателот потоа треба да прими претставници на централно-десничарските партии, вклучително и републиканците, а во понеделник претставници на екстремната десница и Националното собрание.
Центристите, конзервативната десница и екстремно десничарските партии се заканија дека ќе и изгласаат недоверба на новата влада доколку ја предводи претставник на ЛФИ, додека партијата ја упати истата закана доколку кандидатот за премиер не е од нивната коалиција НФП.
Оваа коалиција освои најмногу места во парламентот, 193, но значително помалку од 289-те потребни за апсолутно мнозинство, потсетува Гардијан.
Во рамките на коалицијата НФП најмногу пратеници освои партијата ЛФИ, пренесува Танјуг.
Франција е во политички ќор-сокак од почетокот на јули откако парламентот не гласаше за мнозинство, но остана поделена на приближно три еднакви блока: левица, центристи и крајна десница, од кои ниту еден го нема потребното мнозинство.
Центристичката влада предводена од Габриел Атал поднесе оставка по изборите, но имаше минимални административни функции за време на периодот на Олимпијадата.
Портпаролот на Елисејската палата не можеше да прецизира кога ќе биде назначен новиот премиер пред средбите на Макрон со партиските претставници.
„Претседателот има јасна цел: тој побара од републиканските сили да се слушаат меѓусебно и да работат на формирање стабилно мнозинство, за да има најмногу пратеници“, рече портпаролот.
Тој додаде дека изборите донесоа три лекции.
„Прво, мнозинството во заминување загуби. Второ, Франција не сакаше влада предводена од екстремната десница и Националното собрание, и трето, ниту една коалиција не е во позиција да има мнозинство, што е првпат во историјата на Петтата република“, заклучи тој.