Европската унија и НАТО денеска ја објавија одлуката за формирање оперативна група за заштита и отпорност на критичната инфраструктура, изјави претседателката на Европската комисија Урсула фон дер Лајен пред почетокот на состанокот на Колеџот на комесари, каде што беше и генералниот секретар на НАТО, Јенс Столтенберг.
„Во оперативната група, експертите на ЕУ и НАТО ќе работат заедно за да ги идентификуваат клучните закани за нашата критична инфраструктура, да ги проучуваат ранливостите и да развијат клучни принципи за подобрување на отпорноста, но и да дадат предлози за поправни мерки и активности“, нагласи Фон дер Лејен.
Таа посочи дека оперативната група првично ќе ги опфати транспортот, енергетиката, дигиталната област… а потоа групата ќе известува до земјите членки на ЕУ и НАТО.
„НАТО и ЕУ работат заедно и решивме да формираме оперативна група за отпорност и критична инфраструктура. Нашата желба е заедно да размислуваме како да ја направиме нашата критична инфраструктура и технологија поотпорна на потенцијални закани и да преземеме активности за да ги санираме можните ранливости Тоа е важен чекор кон зајакнување на нашите општества“, рече Столтенберг.
На денешната редовна средба на комесарите на Европската комисија, во присуство на првиот човек на Алијансата, тема е поддршката за Украина и последиците по европската безбедност.
Фон дер Лајен изјави дека ќе разговараат и за потенцијални промени кои се неопходни во политиките на Унијата и НАТО за безбедноста на Европа и европскиот регион.