Турскиот претседател Реџеп Таип Ердоган вети дека ќе продолжи со спасувачките напори и брзата реконструкција на уништените згради, повеќе од една недела по разорниот земјотрес што ја погоди неговата земја и соседна Сирија.
Бројот на загинати во двете земји надмина 41.000, а преживеаните кои останаа без домови се справуваат со зимските температури.
„Ќе продолжиме да работиме додека не го најдеме последниот граѓанин што остана под урнатите згради“, рече Ердоган доцна во вторникот по состанокот на владата одржан во седиштето на Агенцијата за управување со катастрофи и вонредни состојби (АФАД).
Проценката на штетите на неколку десетици илјади уништени објекти ќе биде завршена за една недела, а реконструкцијата ќе започне за неколку месеци, тврди турскиот претседател.
„Ќе ги обновиме сите куќи и работни места, уништени или непогодни за живеење поради земјотресот и ќе ги предадеме на нивните вистински сопственици“, додаде тој.
Повеќе од 105 илјади луѓе се повредени во земјотресот, а повеќе од 13 илјади се уште се во болници, рече Ердоган.
Во средата во градот Кахраманмарас била спасена 42-годишна жена, која поминала 222 часа под урнатините, објави турската телевизија ТРТ.
Во текот на ноќта во средата, 77-годишната Фатма Гунгор била спасена од урнатините на седумкатница во градот Адијаман, 212 часа по првиот земјотрес, јавуваат турските медиуми.
Во вторникот во Турција беа спасени уште девет преживеани, бидејќи фокусот на хуманитарните напори се префрли на оние кои сега немаат засолниште или храна во студените услови.
Ердоган ги призна проблемите во првичниот одговор на земјотресот со јачина од 7,8 степени според Рихтеровата скала што се случи во раните утрински часови на 6 февруари, но рече дека ситуацијата сега е под контрола.
„Се соочуваме со една од најголемите природни катастрофи, не само во нашата земја, туку и во историјата на човештвото“, рече Ердоган.
Земјотресот во Турција се случи пред мајските избори на кои Ердоган бара нов мандат.
Турската опозиција ги обвини турските власти за блокирање на социјалните мрежи веднаш по земјотресот поради критиките кон нив за неорганизираната спасувачка операција.
Повеќе од 2,2 милиони луѓе веќе ги напуштија најтешко погодените области, рече Ердоган, а стотици илјади згради станаа непогодни за живеење.
„Луѓето многу страдаат. Аплициравме за шатор, помош или нешто слично, но досега не сме добиле ништо“, рече Хасан Саимуа, бегалец кој со своето семејство престојува на игралиште во градот Газиантеп во југоисточна Турција.
Саимуа и другите Сиријци најдоа засолниште во Газиантеп откако избегаа од војната дома.
Откако поради земјотресот повторно станаа бездомници, на игралиштето направија импровизирани шатори од пластични чаршафи, ќебиња и картон.
„Потребите се огромни и растат од час во час“, рече Ханс-Хенри П. Клуге, директор на Светската здравствена организација за Европа.
Околу 26 милиони луѓе во двете земји имаат потреба од хуманитарна помош.
„Исто така, постои зголемена загриженост за новите здравствени проблеми поврзани со студеното време, хигиената и санитарните услови и ширењето на заразни болести – кај ранливите луѓе особено изложени на ризик“, предупреди Клуге.
Сите информации поврзани со најновите случувања со војната во Украина можете да ги прочитате ТУКА.