Две лица загинаа, а четворица се повредени кога едно лице отвори оган во трговски центар во градот Боис во американската сојузна држава Ајдахо, соопшти локалната полиција, додавајќи дека осомничениот за нападот е уапсен.
Како што утрово јави Гласот на Америка (VOA), дошло до размена на оган меѓу полицијата и осомничениот.
Меѓу повредените има и еден полицаец.
Полицијата го пребарала поголемиот дел од трговскиот центар во потрага по можни други жртви.
Информации за жртвите и осомничениот не се соопштуваат, а истрагата е во тек.
Началникот на полицијата во Бојз, Рајан Ли, изјави дека пукањето било пријавено во понеделникот во 13:50 часот, по локално време, кога било пријавено дека едно лице е „погодено“.
Кога полицијата пристигнала во трговскиот центар, забележала лице кое одговарало на описот на осомничениот.
Ли додаде дека истражителите веруваат дека немало други напаѓачи и дека нема закана за други граѓани.
„Во овој момент не можеме да зборуваме за мотивот бидејќи би било прерано“, изјави началникот на полицијата.