Кумановци сè уште можат да дадат мислење, предлог за идејното сообраќајно решение за изградба на кружен тек на крстосницата помеѓу булеварите „Октомвриска револуција“ и „Трета македонска ударна бригада“, повика денеска градоначалникот Максим Димитриевски. Ова решение е продолжување на претходно дадените најави за изградба на кружни текови низ сообраќајниците во градот.
– Оваа крстосница е со висок ризик во сообраќајот, правевме јавни истражувања за неа и го дадовме идејното решение на јавен увид на граѓаните. Според коментарите и насоките коишто доаѓаат од нив, општо прифатливо е решението. Ќе се обидеме во следниот буџет да обезбедиме средства и да го финансираме овој проект, изјави Димитриевски.
Тој рече дека ќе се изработи и нов проект за крстосницата кај зелениот градски пазар. Димитриевски потенцираше дека од март општината е деблокирана, финансиски е стабилна и доколку се продолжи со, како што рече, домаќинско работење и ако се соберат приходи ќе се обезбедат средства за изградба на кружни текови од кои корист ќе имаат граѓаните, ќе се зголеми безбедноста, а и градот ќе добие модерен лик.
Претходно во Куманово, првпат во 2019 година беше изграден кружен тек на влезот од градот помеѓу булеварот „Трета македонска ударна бригада“ и улицата „11 Октомври“ за што од општинскиот буџет беа одвоени 19,7 милиони денари.
МИА