Градоначалникот на Општина Куманово Максим Димитриевски денеска на прес конференција ги покани своите противкандидати од локалните избори да разговараат за нивните изборни програми и од нив да се извлечат најдобрите проекти што ќе се реализираат во следните четири години.
Како што рече Димитриевски тоа е еден од заклучоците на координативниот состанок што го одржала иницијативата „За наше Куманово“.
– Со оглед на тоа што сме граѓанска иницијатива, за сите нас кумановчани важно е да имаме најдобри идеи и проекти за нашиот град. Како градоначалник ветив дека ќе разговарам со сите кандидати за градоначалници за да видиме што е најдобро за нашата општина. Секој од нас зборува за соработка, а всушност ние суштинска соработка немавме. А таа соработка може само да биде добра за граѓаните на нашиот град, изјави Димитриевски.
Тој ги повика противкандидатите во понеделник во 14:00 часот на состанок каде ќе се разговара за изборните програми.
– Ќе побарам суштинските проекти од нивните програми да се инкорпорираат во една заедничка програма и заедно во следните четири години да ги реализираме. Граѓанскиот интерес мора да биде пред партискиот или личниот интерес. Концептот „За наше Куманово“ излегува од граѓаните и ќе работи исклучиво за граѓаните на нашиот град, изјави градоначалникот.
Според Димитриевски, граѓаните треба да имаат квалитетни решенија, и не треба да бидат разочарани.
Никола Ивановски