Повеќе од 1.000 трагачи се упатиле кон селото Квалалати во Јужна Африка за да откријат за нив, како што веруваат, дијаманти, откако се рашири веста дека во областа се пронајдени камења од неидентификувано потекло.
Луѓето од целата земја дошле и копале заедно со локалното население за да ги пронајдат камењата за кои се верува дека се дијаманти од голема вредност. Овој настан внесе надеж кај локалното население дека конечно следат подобри времиња.
– Ова откритие го смени мојот живот. Никој од нас не испраќа стабилно и безбедно, јас работам повремено. Кога му кажав на семејството што открив, сите беа пресреќни – рече еден од копачите додека држеше камења во рацете.
Друг локален се согласил со него, велејќи дека не очекувал некогаш да држи дијамант во раката.
Одделот за руда соопшти дека испратиле тим составен од експерти за рударство и геологија за да соберат примероци и да ги анализираат камчињата.
– Ќе дадеме се од себе да ги добиеме анализите во најбрз можен рок – беше речено од Одделот за руда, пишува Метро.
Сепак, фактот дека сè уште нема стручна потврда дека станува збор за дијаманти, не ги спречи трагачите да дојдат и да копаат со цел да ги пронајдат камењата.
– Од улицата, можете да видите како млади и стари копаат по полињата како бараат камења – рече еден од копачите.
Јужна Африка со години се бори со висока стапка на невработеност, а милиони луѓе живеат во целосна сиромаштија. Оваа земја исто така се соочува со голема разлика помеѓу богатите и сиромашните, а пандемијата на коронавирусот дополнително ја влоши веќе тешката состојба.
Некои луѓе веќе започнале да продаваат камења и цените се движат од 7 до неколку десетици долари.
Провинциската влада побара сите копачи да бидат отстранети од местото за да можат надлежните служби да прават анализи без пречки, а властите стравуваат и од можно ширење на коронавирусот.
Без разлика дали станува збор за скапоцен камен или обичен минерал со мала вредност, резултатите од анализата ќе го покажат тоа.
