По 21-ви пат Библиотеката „Тане Георгиевски“ ќе го одбележи Светскиот ден на книгата и авторското право – 23-ти Април, а сите членови на библиотеката кои денеска ќе земат или вратат книга за читање на подарок ќе добијат цвет и книга.
Тоа е според стариот Каталонски обичај од каде потекнува идејата и традицијата за одбележување на овој ден, што се совпаѓа со годишнината од смртта на книжевните великани – Сервантес и Шекспир.
За првпат во 1995 година УНЕСКО одлучи 23-ти април да им го посвети на книгите и авторите, поттикнувајќи ги сите, особено младите, да уживаат во пишаниот збор и да покажат почит кон незаменливиот придонес на оние што ги создаваат. Се смета дека 23 Април е земен како повод бидејќи на тој ден во 1616 година починале двајцата великани на светската книжевност – Мигуел де Сервантес и Вилијам Шекспир.
За моќта и значењето на книгата, што се таа може да постигне, колку голем придонес има во напредувањето во секое животно доба, а особено во младоста, за овој најмоќен медиум на сите времиња, пишува во светската и македонската порака што ги испраќаат Генералниот директор на УНЕСКО, Ирина Бокова и Љубиша Георгиевски.