Шефот за надворешна политика и безбедност на ЕУ, Жозеп Борел, во понеделникот изјави дека во моментов не очекува напредок во разговорите за заживување на нуклеарниот договор со Иран од 2015 година.
– Не очекувам никаков напредок, срамота е бидејќи бевме многу блиску до постигнување напредок – изјави Борел пред новинарите по пристигнувањето на состанокот на министрите за надворешни работи на ЕУ во понеделник во Луксембург, пренесува Ројтерс.
Во светлината на бруталниот обид да се задушат масовните антивладини демонстрации во Иран, партијата на германскиот канцелар Олаф Шолц повика на прекин на разговорите со Техеран во врска со нуклеарните амбиции на Иран.
– Разговорите мора да се завршат – изјави Саскиа Ескен, лидер на водечката партија во коалициската влада во неделното гостување во програмата на ЗДФ.
– Дојде време да се каже: „Доста е, ја повлекуваме линијата овде“ – рече Ескен, нагласувајќи го односот кон жените и мажите кои излегоа на улиците на Иран да протестираат.
Германија, заедно со САД, Велика Британија, Русија, Кина и Франција, е дел од преговарачкиот тим кој води разговори со Иран за обновување на договорот за нуклеарната програма од 2015 година, кој има за цел да ја спречи оваа земја да произведува нуклеарно оружје.