Американскиот државен секретар Ентони Блинкен изјави дека ослободувањето на петмина Американци од затворот во Иран е позитивен чекор и почеток на процес кој тој очекува дека ќе доведе до нивно враќање во САД.
Блинкен им рече на новинарите дека Стејт департментот разговарал со пет Американци во четвртокот и дека нема сознанија за други Американци кои сè уште се притворени во Иран, објави Ројтерс.
Техеран и Вашингтон постигнаа договор за размена на затвореници и ослободување на блокираните ирански средства, објави вчера АП.
Иранските власти префрлија пет иранско-американци од затвор во домашен притвор, како дел од договорот за одмрзнување на милијарди долари блокирани во Јужна Кореја, соопштија американски и ирански власти.
Договорот е постигнат по неколкумесечни засилени тензии меѓу двете земји, јави АП.
Договорот вклучуваше шест до седум милијарди долари
Иранските власти во Обединетите нации ги потврдија условите на договорот за агенцијата, додавајќи дека трансферот на затвореници „означува значаен почетен чекор во спроведувањето на овој договор“.
Тие, исто така, потврдија дека договорот вклучувал шест до седум милијарди долари кои биле замрзнати како резултат на санкциите.
Иранската мисија во ОН соопшти дека парите ќе бидат префрлени во Катар пред да бидат испратени во Иран, доколку договорот биде реализиран.
Конечниот трансфер на пари и евентуалното ослободување на петмината уапсени се очекува во текот на следниот месец, поради сложеноста на финансиските трансакции, велат надлежните.
Договорот е постигнат во време на големо трупање на американската војска во Персискиот залив, со можност американските трупи да се качат и да ги чуваат трговските бродови во Ормускиот теснец, низ кој минуваат 20 отсто од сите испораки на нафта.