Во Белгија расте десничарскиот и антивладиниот екстремизам, особено кај многу млади луѓе, се заклучува во извештајот на белгиската државна безбедност до кој пристап имале весниците „Ле Соар“ и „Кнак“.
Во својот последен разузнавачки извештај за 2021 и 2022 година, цивилната домашна безбедност за првпат известува за „загрижувачката радикализација на повеќе млади луѓе“ во однос на екстремната десница.
„Графички стил и содржина, омраза и отворено насилни објави на различни платформи на социјалните медиуми, како што е Телеграм, има некои сличности со глорификацијата на насилството од страна на Исламската држава пред неколку години“, се вели во извештајот цитиран од медиумите.
Се додава дека „во некои случаи тоа биле малолетници кои проповедаат омраза и насилство преку екрани, со радикални нацистички и антисемитски ставови“.
Во други случаи, токму младите се заканувале дека ќе прибегнат на насилство.
Генералниот администратор Франциска Бостин во интервју за овие два весника прецизира дека тоа важи и за младите од 14-15 години.
„Го видовме тоа за време на периодот на Ковид-19: многу млади луѓе беа дома, изолирани, одеа на немодерирани форуми и имаа пристап до доста радикален дискурс. Дискурс кој интегрира и репродуцира. Во многу случаи навистина зборуваме за малолетници“, вели Бостин. Таа додаде дека оваа појава не важи само за Белгија, туку и за другите земји во Европа, пренесува Танјуг.