Украинските бегалци привремено се враќаат дома за да добијат сексуална и репродуктивна здравствена заштита, откако нивните можности се ограничени во Унгарија, Полска, Романија и Словачка, додека други бараат нелегални решенија, се вели во студијата објавена од Центарот за репродуктивни права.
Во студија објавена вчера, девет меѓународни организации за човекови права го документираат алармантното влијание што рестриктивните национални закони го имаат врз бегалците кои бараат основна грижа и поддршка, објави бриселскиот портал „Еурактив“.
Наодите на извештајот се засноваат на повеќе од 80 интервјуа спроведени помеѓу јули 2022 и април 2023 година.
Откри дека украинските бегалци се соочуваат со штетни одложувања, вознемиреност, страв, финансиски тешкотии, институционален расизам и несоодветна грижа, што директно влијае на нивното здравје и благосостојба.
– Здравјето и благосостојбата на некои бегалци од Украина се загрозени поради неуспехот да се гарантира пристап до основната и временски чувствителна здравствена заштита и услуги за поддршка, што ја зголемува штетата што ја претрпеа како резултат на инвазијата на Украина, рече Леа Хоктор, виш регионален директор за Европа во Центарот за репродуктивни права.
– Европската унија вети дека ќе им обезбеди засолниште и грижа на бегалците од Украина. Меѓутоа, жените од Украина… често доживуваат сосема поинаква реалност кога им е потребна грижа за сексуалното и репродуктивното здравје… и се соочуваат со пречки, ограничувања, конфузија, стигма и дискриминација – додаде таа.
Унгарија, Полска, Романија и Словачка имаат многу рестриктивни средини во однос на заштитата на репродуктивното здравје и услугите за поддршка на родово базирано насилство.
Извештајот покажа дека жените се соочуваат со законски ограничувања, бариери на трошоците, недостаток на информации и лош квалитет на грижата кога добиваат таква поддршка.
Понатаму, жените кои бараат репродуктивна нега често се соочуваат со сериозни закани, малтретирање и заплашување во контексти каде репродуктивните права не се државен приоритет.
Полска е една од најрестриктивните средини за сексуално и репродуктивно здравје и права во Европа.
По одлуката на Уставниот суд во 2020 година, абортусот е легален само кога бременоста е резултат на кривично дело или кога животот или здравјето на жената е во значителна опасност.
Бегалците од Украина во Полска се принудени да се вратат во Украина заради абортуси или да добијат нега во други делови на Европа.
Словачка ги нема потребните услуги за да одговори на потребите на жените од Украина, било да се тоа абортуси, контрацептивни услуги или поддршка за родово засновано насилство.
По инвазијата, организациите за човекови права во Унгарија веднаш се мобилизираа за да одговорат на потребите на бегалците од Украина, но една година подоцна, организациите кои обезбедуваат сексуална и репродуктивна грижа продолжуваат да се соочуваат со големи правни, финансиски и оперативни предизвици.
И во Романија, родовите стереотипи и повеќекратните форми на дискриминација предизвикуваат проблеми за бегалците, особено кога станува збор за репродуктивното здравје.
Сите информации поврзани со најновите случувања со војната во Украина можете да ги прочитате ТУКА.