Американскиот претседател Џо Бајден во петокот го посети седиштето на Централната разузнавачка агенција (ЦИА) и им се заблагодари на персоналот на агенцијата што го предупреди светот за плановите на рускиот претседател Владимир Путин да ја нападне Украина.
Тој ја поздрави „тивката храброст на американските шпиони“.
На 75-годишнината на ЦИА, Бајден рече дека бил вклучен во агенцијата 52 од нејзините 75 години, најпрво како помлад сенатор во комитетот формиран во 1975 година за да ги истражува експериментите за контрола на умот и другите злоупотреби од агенцијата.
За разузнавачките податоци собрани од ЦИА, тој истакна дека тие ги разоткриле плановите на Путин и му овозможиле на Вашингтон да ги предупреди другите земји за војна.
„Благодарение на неверојатната работа на нашите професионалци во разузнавањето, можевме однапред да го предупредиме светот што планира Владимир Путин во Украина. Откривањето на играта на Путин направи огромна дупка во преправањето и ги дискредитираше неговите лаги за она што го правевме во Украина“, рече Бајден.
Пред руската инвазија на Украина на 24 февруари, додека Русија собра повеќе од 100.000 војници на границата со Украина, Путин постојано ги обвинуваше САД и другите западни сили дека намерно креирале сценарио за да ја намамат Москва во војна.
Бајден истакна дека оваа година на Ѕидот на ѕвездите биле додадени две ѕвезди, што значи дека животот го загубиле уште двајца оперативци на ЦИА.
„Вашето физичко здравје и благосостојба се од клучно значење за мене и за вашето раководство овде во ЦИА“, рече Бајден.
Сите информации поврзани со најновите случувања со војната во Украина можете да ги прочитате ТУКА.