Американскиот претседател Џозеф Бајден ја оспори денеска изјавата на украинскиот претседател Володимир Зеленски дека ракетата што падна во Полска, при што загинаа две лица, не е од украинско потекло.
„Тоа не е доказ“, им рече Бајден на новинарите во Белата куќа по враќањето од патувањето во Азија, според Ројтерс.
Зеленски вчера изјави дека е убеден оти експлозијата во која загинаа две лица во Полска не е предизвикана од проектил од Украина.
„Немам дилема, тоа не е наша ракета“, изјави Зеленски за украинските медиуми, пренесува Ројтерс.
Генералниот секретар на НАТО Јенс Столтенберг вчера изјави дека истрагата за падот на ракетата на територијата на Полска е во тек, но дека прелиминарните анализи „сугерираат дека инцидентот најверојатно бил предизвикан од украинска ракета за противвоздушна одбрана“.
Столтенберг на прес-конференцијата прецизираше дека најверојатно станува збор за проектил „истрелан со цел да се одбрани украинската територија од напади на руски крстосувачки ракети“.