Поради забрзаната транзиција кон употреба на електрични возила, глобалната автомобилска индустрија ќе продолжи да има проблеми со недостиг на полупроводници во наредните години, пишува Financial Times.
За кризната ситуација што го тресе пазарот сведочи и Хасан Ел Коори, извршен директор на американскиот производител на полупроводници Онсеми, кој наведува дека сите чипови од силициум карбид (SiC), напредни енергетски полупроводници главно наменети за електрични возила, се распродадени до крајот на 2023 година поради огромната побарувачка.
„Не можете да направите ништо сега за да ја промените ситуацијата во 2023 година. Ќе додаваме капацитет секој квартал, секој месец за следната година за да ги задоволиме потребите на нашите клиенти“, рече Куори.
Поради огромната побарувачка што моментално владее на пазарот, германскиот производител на полупроводници Infineon Technologies во својата анализа ја зголеми прогнозата за раст на приходите на повеќе од 10 проценти во наредните години.
Последната финансиска анализа не дава конкретна временска рамка колку долго би можел да трае тој раст.
Сепак, поради ваквите оптимистички очекувања, компанијата најави голема инвестиција од 5 милијарди евра за изградба на фабрика во Дрезден, која ќе произведува полупроводници за автомобилската и другите индустрии.
Во исто време, заедно со овие најави од Германија, споменатиот производител Onsemi открива планови за проширување на производството за 30 проценти за своите фабрики во Чешка, Јужна Кореја и САД.
Од друга страна, додека производителите на чипови за автомобилската индустрија задоволно тријат раце, во другите делови од секторот, особено во индустријата за полупроводници за паметни телефони и компјутери, има пад на побарувачката.
Тајванскиот TSMC, најголемиот светски производител на чипови што ги снабдува водечките играчи на овој пазар, веќе објави дека планира да ги намали инвестициите за околу 10 отсто поради помалиот интерес за купување полупроводници.