Американската војска соопшти дека уништила шест мали ирански бродови и пресретнала крстосувачки ракети и беспилотни летала лансирани од Техеран во обид да ги попречи напорите на САД за деблокирање на Ормутскиот теснец.
Американскиот претседател Доналд Трамп ја започна операцијата „Проект слобода“ со цел да ја преземе контролата врз блокираниот од Иран теснец, пишува Ројтерс.
Шефот на Централната команда на американската војска, Бред Купер, потврди дека Иранската револуционерна гарда се обидува да ја спречи оваа операција.
„Тие лансираа повеќе крстосувачки ракети, беспилотни летала и мали пловила кон бродовите што ги штитиме. Сите тие закани беа неутрализирани“, рече Купер.
Тој, исто така, ги предупреди иранските сили да се држат подалеку од американската војска за време на операцијата, во која учествуваат околу 15.000 војници, разурнувачи, повеќе од сто авиони и подводни средства.
Мините се отстрануваат од Ормутскиот теснец, а САД испратија два комерцијални брода како доказ за безбедноста на рутата.
Од друга страна, Иранската револуционерна гарда тврди дека ниту еден комерцијален брод не поминал низ теснецот во последните неколку часа и дека тврдењата на САД се лажни.
Иранските државни медиуми, исто така, негираат дека американските сили потопиле ирански бродови.