Иран ќе ги конфискува средствата на иранските граѓани во странство „кои се виновни за соработка“ со САД и Израел, во услови на војна што ја водат Вашингтон и Тел Авив против Техеран, објави Канцеларијата на иранскиот државен обвинител.
Во соопштението објавено во неделата се повикува на донесување закон минатиот октомври, кој предвидува дека секоја соработка со Израел, САД „или други непријателски држави или групи е предмет на конфискација на целиот имот“ и други законски казни според Исламскиот кривичен законик, објави државната телевизија Прес ТВ.
„Секоја оперативна акција во име на ционистичкиот (израелски) режим или непријателски влади, вклучувајќи ја и американската влада или други непријателски режими и групи, или во име на кој било од нивните поврзани елементи, против безбедноста на земјата, ќе подразбира конфискација на целиот имот, во согласност со последниот дел од Забелешката (5) од член (19) од Исламскиот кривичен законик усвоен на 21 април 2013 година, како што е изменет, и смртна казна“, се наведува во законот, цитиран од Прес ТВ.
Според иранските власти, повеќе од 1.200 луѓе се убиени, вклучувајќи го и врховниот лидер ајатолахот Али Хамнеи, а повеќе од 10.000 се повредени откако САД и Израел започнаа заеднички напад врз Иран на 28 февруари.
Техеран возврати со напади со беспилотни летала и ракети насочени кон Израел и земјите од Персискиот Залив кои имаат американски воени бази.
Иранскиот совет на експерти во неделата го избра синот на Хамнеи, Моџтаба Хамнеи, за нов врховен лидер на земјата.