Претседателот на Тајван, Лаи Чинг-те, изјави дека Тајван сака мир и дијалог со Кина, но дека владата мора да продолжи да ги зајакнува одбранбените капацитети на островот.
Тој ја пренесе оваа порака до јавноста во вторник, по повод одбележувањето на првата година од неговиот претседателски мандат.
Кина, која го нарекува Лаи „сепаратист“, ги отфрли неговите бројни понуди за разговори.
Лаи, од друга страна, ги отфрла тврдењата на Кина за суверенитет над Тајван, нагласувајќи дека само тајванскиот народ има право да одлучува за иднината на островот.
Иако тајванската влада предупреди дека Кина би можела да ја одбележи годишнината со воени вежби, Лаи се обрати со мирен тон од претседателската канцеларија во центарот на Тајпеј, објави Ројтерс.
– Јас сум посветен на мирот затоа што мирот е бесценет, а војната нема победници. Сепак, во потрагата по мир, не смееме да негуваме илузии – рече Лаи.
Тој нагласи дека Тајван ќе продолжи да инвестира во одбраната бидејќи, како што рече, „подготовката за војна е најдобриот начин да се избегне војна“.
– Тајван е подготвен да соработува со Кина доколку постои меѓусебно почитување. Да ги замениме тензиите со размена, а конфликтите со дијалог – рече тој.
Кинеското министерство за одбрана минатата недела изјави дека Лаи е „креаторот на кризата во Тајванскиот теснец“, обвинувајќи го за ескалација на конфронтацијата и дестабилизација на регионот.
Покрај политичките и безбедносните предизвици, Лаи се соочува и со економски притисоци, вклучително и можни американски царини кои моментално се во тек.
Сепак, тој тврди дека разговорите со Вашингтон продолжуваат „непречено“.
Со цел да се зајакне домашната економија, тајванската влада планира да формира државен фонд фокусиран на технолошки развој.
– Владата ќе воспостави суверен инвестициски фонд, национална инвестициска платформа предводена од државата, во партнерство со приватниот сектор, користејќи ја технолошката сила на Тајван – најави Лаи, без дополнителни детали.