Рекордни температури од над 40 степени беа забележани оваа недела во Кина, објавија државните медиуми.
Во последните неколку години, Кина се соочува со екстремни временски услови, од топлина до суши, обилни дождови и поплави.
Кина е најголемиот емитер на стакленички гасови во светот, но е исто така и огромен производител на обновлива енергија и се надева дека ќе достигне јаглеродна неутралност до 2060 година.
Меѓу градовите најпогодени од високата жештина е Џенгжу, метропола со 13 милиони жители и главен град на централната покраина Хенан, каде што денес беа измерени 41 степен Целзиусов, објави денес државната телевизија CTV.
Во градот Линџоу, малку подалеку на север, температурата се искачи на 43,2 степени Целзиусови, додека во градот Шахе, во северната покраина Хебеј, беа измерени 42,9 степени Целзиусови, соопшти националната метеоролошка служба.
Но, тие екстремни температури би требало да се намалат до петок, со ненадејни падови од 15 степени Целзиусови на некои места, јавува Бета-АФП.
Кина значително го зголеми својот капацитет за енергија од ветер и сончева енергија во последниве години за да ја намали зависноста на својата економија од јаглен, извор на енергија што е многу загадувачки.
Сепак, според експертите, Кина заостанува зад една од своите најважни цели за 2030 година, имено намалувањето на интензитетот на јаглерод (емисиите на јаглерод диоксид во однос на БДП) за 65 проценти во споредба со 2005 година.
Зголемувањето на производството на обновлива енергија во Кина доведе до намалување на емисиите на јаглерод диоксид во првиот квартал од 2025 година, дури и кога побарувачката за електрична енергија силно расте.
Со својот нов капацитет за ветер, сончева и нуклеарна енергија, емисиите на јаглерод диоксид во Кина се намалија за 1,6 проценти на годишно ниво, според Лаури Миливирта, аналитичар во Центарот за истражување на енергијата и чистиот воздух (CREA), истражувачки институт со седиште во Финска.
Кина минатиот месец објави дека нејзиниот капацитет за производство на енергија од ветер и сончева енергија за прв пат го надминал производството на термоелектраните, кое доаѓа претежно од електрани на јаглен, во првиот квартал.
Јагленот останува неопходен елемент во различните извори на енергија во Кина.
И покрај зајакнувањето на производството на енергија од обновливи извори, во 2024 година Кина започна со изградба на електрана на јаглен со капацитет од 94,5 гигавати, што е 93 проценти од вкупното светско производство минатата година, според извештај објавен во февруари од CREA и американскиот Global Energy Monitor (GEM).
Производството на јаглен во Кина постојано расте во последните години, движејќи се од 3,9 милијарди тони во 2020 година на 4,8 милијарди тони во 2024 година.