Лидерите на Франција, Велика Британија, Германија и Италија разговараа телефонски со американскиот претседател Доналд Трамп во неделата пред неговата денешна средба со рускиот претседател Владимир Путин во обид да се стави крај на конфликтот во Украина, соопшти британската влада.
Шефовите на држави и влади „разговараа за ситуацијата во Украина и катастрофалната цена на војната за двете страни“, изјави неименуван портпарол на британскиот премиер Кир Стармер.
„Пред телефонскиот разговор на претседателот Трамп со претседателот Путин (денес), лидерите разговараа за потребата од безусловно примирје и потребата претседателот Путин сериозно да ги сфати мировните преговори“, додаде тој.
По неуспешните разговори меѓу Киев и Москва во Турција во петокот, шефовите на држави и влади „разговараа и за употреба на санкции доколку Русија сериозно не се вклучи во прекин на огнот и мировните преговори“, соопшти британската влада.
„На претседателот Путин е да докаже во понеделник дека навистина сака мир и да го прифати безусловното 30-дневно примирје предложено од претседателот Трамп и поддржано од Украина и Европа“, напиша францускиот претседател Емануел Макрон на платформата X.
„Европејците и Американците се решени да работат заедно на целен начин за брзо да се стави крај на оваа ужасна војна“, изјави германскиот канцелар Фридрих Мерц во неделата по првата миса на поглаварот на Римокатоличката црква, папата Лав XIV.
Мерц додаде дека „во последните денови се направени некои мали чекори напред, бидејќи страните во конфликтот разговараат меѓусебно“.
Германскиот канцелар го изјави ова два дена по првите разговори од пролетта 2022 година, кои не резултираа со примирје.
Француските, британските и германските лидери веќе разговараа со Трамп во петокот, како и со полскиот премиер Доналд Туск.
Во меѓувреме, украинскиот претседател Володимир Зеленски разговараше со американскиот потпретседател Џ.Д. Венс во Рим во неделата „околу половина час“ по средбата со папата, изјави за АФП неименуван висок украински функционер.