Обединетите нации и невладините организации рекоа дека Судан се наоѓа во средината на најтешката хуманитарна криза во светот, бидејќи граѓанската војна во земјата влегува во третата година.
Конфликтот меѓу суданската армија и паравоената група Сили за брза поддршка (РСФ) доведе до масовно раселување, гладување и напади на бегалски кампови, пишува Гардијан.
Во Лондон денеска се одржа меѓународен состанок на министри од 20 земји, чија цел беше заживување на мировните преговори, кои често беа задушени од други светски кризи, вклучително и војните во Украина и Газа.
На втората годишнина од почетокот на борбите во Картум, се појавија извештаи за стотици луѓе убиени во нападите на РСФ врз бегалските кампови во Западен Дарфур.
Обединетите нации соопштија дека само од кампот Замзам се раселени 400.000 луѓе.
„Судан сега е во полоша состојба од кога било досега. Најголемата хуманитарна криза, најголемата криза со раселување, најголемата криза со глад… ги уриваме сите погрешни рекорди“, изјави Алиса Налбандијан од невладината организација Оксфам.
Досега загинаа десетици илјади луѓе, речиси 13 милиони се раселени, а четири милиони од нив се преселиле во соседните земји.
Речиси половина од вкупното население, околу 25 милиони луѓе, немаат доволно храна, а во неколку региони официјално е прогласен глад.
Според ОН, најмалку 400 луѓе се убиени во неодамнешните напади на РСФ врз Ел Фашер и околните кампови за раселени лица.
Високиот комесар на ОН за човекови права Волкер Турк рече дека нападите се „јасен показател за цената на неактивноста на меѓународната заедница“, предупредувајќи дека градот е под опсада од мај минатата година.
Конфликтот датира од 2019 година, кога лидерот на армијата, генерал Абдел Фатах ал-Бурхан и лидерот на РСФ, генералот Мохамед Хамдан Дагало, заеднички го соборија долгогодишниот лидер Омар ал-Башир.
Нивната соработка се распадна во 2023 година, што доведе до отворена војна.
РСФ е обвинета за бројни напади врз населението, вклучително и етничко чистење, групни силувања и убиства.